ডিজিটেল ডেস্কঃ আজি প্ৰাক্তন প্ৰধানমন্ত্ৰী, ভাৰত ৰত্ন অটল বিহাৰী বাজপেয়ীৰ ৯৭ সংখ্যক জন্মজয়ন্তী। বাজপেয়ীৰ জন্মজয়ন্তী উপলক্ষে সমাধিস্থলীত উপস্থিত থাকে প্ৰতিৰক্ষা মন্ত্ৰী ৰাজনাথ সিঙ, লোকসভাৰ অধ্যক্ষ ওম বিৰালা, প্ৰধানমন্ত্ৰী নৰেন্দ্ৰ মোদী, কেন্দ্ৰীয় গৃহমন্ত্ৰী অমিত শ্বাহকে ধৰি বহুকেইজন ৰাজনৈতিক নেতাও।

স্বাধীন ভাৰতৰ ১০ সংখ্যক প্ৰধানমন্ত্ৰী আছিল অটল বিহাৰী বাজপেয়ী। তেখেত মুঠ তিনিবাৰৰ বাবে প্ৰধানমন্ত্ৰী হিচাপে কাৰ্যভাৰ গ্ৰহণ কৰিছিল। পোনপ্ৰথমবাৰ ১৯৯৬ চনত মাত্ৰ ১৩ দিনৰ বাবে, ১৯৯৮ – ১৯৯৯ চনত ১৩ মাহৰ বাবে আৰু চুড়ান্তভাৱে ১৯৯৯ চনৰ পৰা ২০০৪ চনলৈ মুঠ ৫ বছৰকাল প্ৰধানমন্ত্ৰী হিচাপে কাৰ্যনিৰ্বাহ কৰিছিল। ২০১৮ চনৰ ১৬ আগষ্ট সন্ধিয়া ৫-০৫ মিনিটত দিল্লীৰ এইমছত মৃত্যু হয়।

মৃত্যুৰ ৪ টা বছৰ পিছতো দেশৰ জনগণে আজি স্মৰণ কৰিছে প্ৰধানমন্ত্ৰীগৰাকীক। দেশৰ ভিন্ন প্ৰান্তৰ লগতে অসমতো আয়োজন কৰা হৈছে বাজপেয়ীৰ ওপজা দিনটোক। দীঘলীপুখুৰীৰ পাৰত চৰকাৰীভাৱে আয়োজন কৰা হৈছে সু-শাসন দিৱসৰ। সুশাসন দিৱসৰ এই অনুষ্ঠানত মুখ্যমন্ত্ৰী হিমন্ত বিশ্ব শৰ্মাৰ উপস্থিত হৈ প্ৰাক্তন প্ৰধানমন্ত্ৰীগৰাকীৰ ছবিত মাল্যাৰ্পণ কৰা পৰিলক্ষিত হৈছে।