দেশত প্ৰতি বছৰে ১.৮০ লাখ লোকে পথ দুৰ্ঘটনাত প্ৰাণ হেৰুৱাইছে। ইয়াৰে ৩৩ হাজাৰ অৰ্থাৎ প্ৰায় ২০ শতাংশ লোকে কেৱল ট্ৰাক দুৰ্ঘটনাতহে প্ৰাণ হেৰুৱায়। এই সমস্যা সমাধানৰ বাবে চৰকাৰে এটা নতুন যন্ত্ৰ নিৰ্মাণ কৰিবলৈ ওলাইছে। কেন্দ্ৰীয় পথ পৰিবহণ মন্ত্ৰী নীতিন গাডকাৰীয়ে কয় যে আমি অতি সোনকালে ট্ৰাকৰ দৰে গধুৰ বাহনত এনে যন্ত্ৰ স্থাপন কৰিম, যিয়ে পথ দুৰ্ঘটনা প্ৰতিৰোধৰ ক্ষেত্ৰত অতি সহায়ক বুলি প্ৰমাণিত হ’ব।

নীতিন গাডকাৰীয়ে কয় যে পথ দুৰ্ঘটনা ৰোধ কৰিবলৈ চৰকাৰে গধুৰ বাণিজ্যিক বাহনত তিনিটা নতুন সুৰক্ষামূলক সঁজুলি স্থাপনৰ কথা চিন্তা কৰিছে। এই যন্ত্ৰসমূহে গাড়ী চলোৱাৰ সময়ত চালকসকলক টোপনি যোৱাৰ পৰা ৰক্ষা কৰিব আৰু ই জৰুৰীকালীন ব্ৰেকিং আৰু বাহনৰ স্থিৰতা বজাই ৰখাত সহায় কৰিব। ইয়াৰ দ্বাৰা বৃহৎ পথ দুৰ্ঘটনা ৰোধ কৰাত সহায়ক হ’ব।

সূত্ৰসমূহে কয় যে চৰকাৰে যিবোৰ সঁজুলি নিৰ্মাণৰ পৰিকল্পনা কৰিছে সেইবোৰে ইলেক্ট্ৰনিক ষ্টেবিলিটি কণ্ট্ৰল চিষ্টেম, জৰুৰীকালীন ব্ৰেকিং চিষ্টেম, আৰু চালকৰ টোপনিৰ সতৰ্কবাণী আৰু সুৰক্ষা ব্যৱস্থাৰ ওপৰত অধিক গুৰুত্ব দিব। বৰ্তমান এই যন্ত্ৰসমূহ নিৰ্মাণৰ বাবে পৰামৰ্শ প্ৰক্ৰিয়া চলি আছিল। এই সন্দৰ্ভত এতিয়ালৈকে অংশীদাৰসকলৰ পৰাও কিছু পৰামৰ্শ লাভ কৰা হৈছে।

সূত্ৰই জনাইছে যে পৰামৰ্শ প্ৰক্ৰিয়াৰ পিছত সকলো সবিশেষ চূড়ান্ত হোৱাৰ পূৰ্বে খচৰা অধিসূচনা জাৰি কৰা হ’ব। গডকাৰীয়ে এই সন্দৰ্ভত ৰাজ্যসমূহৰ পৰিবহণ মন্ত্ৰীসকলৰ সৈতেও এক বৈঠকত মিলিত হয়। কেন্দ্ৰীয় মন্ত্ৰীগৰাকীয়ে লগতে কয় যে ট্ৰাক আদি গধুৰ বাণিজ্যিক চালকৰ গাড়ী চলোৱাৰ সময় ৮ ঘণ্টালৈ সীমিত কৰাৰ প্ৰয়োজন আছে। ইয়াৰ বাবেও পৃথক নীতি আৰু নিয়ম বনাব লাগিব।

দুৰ্ঘটনাৰ পৰা হাত সাৰিবলৈ চৰকাৰে দেশজুৰি চালক প্ৰশিক্ষণ বিদ্যালয় স্থাপনৰ কথা কৈছে, যাতে দক্ষ চালক সাজু হ’ব পাৰে। নীতিন গাডকাৰীয়ে কয় যে আগন্তুক ২ বছৰত চৰকাৰে সমগ্ৰ দেশতে ১২৫০ খন চালক প্ৰশিক্ষণ বিদ্যালয় স্থাপন কৰিব। ইয়াৰ বাবে ৪৫০০ কোটি টকাৰ সাহায্য কেন্দ্ৰৰ দ্বাৰা প্ৰদান কৰা হ’ব। ইয়াৰ বাবে ৰাজ্যসমূহে কেৱল মাটিৰ ব্যৱস্থা কৰিব লাগিব। প্ৰথম স্তৰৰ চহৰসমূহত স্থাপন কৰা কেন্দ্ৰসমূহে ১৭.২৫ কোটি টকা পৰ্যন্ত সাহায্য লাভ কৰিব, দ্বিতীয় স্তৰৰ চহৰসমূহে ৫.৫ কোটি টকা, তৃতীয় স্তৰৰ চহৰসমূহে ২.৫ কোটি টকা পৰ্যন্ত সাহায্য লাভ কৰিব।