ডিজিটেল ডেস্কঃ মুছলমানৰ আগ্ৰাসন চলিছে সমগ্ৰ পৃথিৱীত৷ এই কথা মিছা আখ্যা দি খোদ মুছলমান অধ্যুষিত দেশতেই নিৰ্মাণ হ’ব হিন্দু মন্দিৰ৷ পাকিস্তানৰ ৰাজধানী ইছলামাবাদত নিৰ্মাণৰ কাম হাতত লোৱা হৈছে এটা হিন্দু মন্দিৰৰ৷ পাকিস্তানৰ ৰাজধানীত প্ৰথমটো হিন্দু মন্দিৰ নিৰ্মাণৰ সিদ্ধান্ত কিয় লৈছে প্ৰধানমন্ত্ৰী ইমৰাণ খানে? এই বিষয়টোৱে এতিয়া সমগ্ৰতে চৰ্চা হোৱা পৰিলক্ষিত হৈছে৷

পাকিস্তানৰ ৰাজধানীত কিয় নিৰ্মাণ কৰিব প্ৰথমটো হিন্দু মন্দিৰ?

পাকিস্তানৰ ৰাজধানী ইছলামাবাদত প্ৰথম হিন্দু মন্দিৰ নিৰ্মাণৰ কামত অনুমোদন জনাইছে প্ৰধানমন্ত্ৰী ইমৰান খান শাসিত চৰকাৰখনে৷ পাকিস্তানৰ ৰাজধানী ইছলামাবাদত নিৰ্মাণ হ’ব মন্দিৰটো৷ মন্দিৰ নিৰ্মাণ হ’ব লগা ভূমিভাগ পূৰ্বতে পাকিস্তানত বাস কৰা হিন্দু পৰিয়াল এটাই মন্দিৰ পতাৰ বাবেই দান কৰিছিল৷ কিন্তু মাটিখিনিক লৈ কিছু বাদ-বিবাদ চলি থকাৰ বাবে মন্দিৰ নিৰ্মাণৰ কাম আৰম্ভ হোৱা নাছিল৷ শেহতীয়াভাৱে প্ৰধানমন্ত্ৰী ইমৰাণ খানে নিৰ্দেশ দিয়ে যে এই মাটিখিনি যিহেতু মন্দিৰৰ বাবেই প্ৰদান কৰা মাটি গতিকে এই স্থানত মন্দিৰেই নিৰ্মাণ হ’ব৷

কিয় মন্দিৰ নিৰ্মাণৰ বাবে দিয়া ভূমিক লৈ আদালতৰ কাষ চাপিছিল মুছলমান সংগঠন?

শাসিত চৰকাৰখনেই মৌলবাদীৰ প্ৰৰোচনাত এই ভূমি মন্দিৰ নিৰ্মাণৰ বাবে দিয়াৰ ক্ষেত্ৰত অস্বীকাৰ কৰিছিল৷ ইছলামাবাদত প্ৰথমবাৰৰ বাবে ০.৫ একৰ ভূমি মন্দিৰ নিৰ্মাণত প্ৰদান কৰা হৈছে৷ এই ভূমি পোনতে ২০১৬ চনতেই হিন্দু মন্দিৰ, শ্মশান আৰু সামূহিক কেন্দ্ৰ নিৰ্মাণৰ বাবে আৱণ্টন কৰা হৈছিল। কিন্তু এই ভূমি আবন্টন কৰোতেই দেশখনৰ একাংশ সংখ্যালঘু লোকে আপত্তি দৰ্শাই আদালতৰ কাষ চাপে৷ আদালতৰ কাষ চপাৰ বাবেই মাটিখিনিত কোনোধৰণৰ ঘৰ বা মন্দিৰ নিৰ্মাণৰ পৰা বিৰত থাকিবলৈ নিৰ্দেশ দিয়ে আদালতে৷ আদালতৰ নিৰ্দেশৰ পিছতেই বিগত ৫ বছৰে মাটিখিনিত মন্দিৰ নিৰ্মাণৰ কাম বন্ধ হৈ আছিল৷

পাকিস্তানৰ ৰাজধানীত নাই হিন্দু মন্দিৰ, নাই হিন্দুৰ কোনো শ্মশান?

পাকিস্তানৰ ৰাজধানী ইছলামাবাদত বাস কৰা হিন্দুলোকসকলৰ ওপৰত একাংশ মুছলমান সন্ত্ৰাসবাদী সংগঠনে বহুসময়ত আক্ৰমণ চলাই আহিছে৷ কিন্তু শেহতীয়াভাৱে ইমৰাণ খান শাসিত চৰকাৰৰ পাকিস্তানত বাস কৰা হিন্দুসকলক লৈ নৰম স্থিতি প্ৰদৰ্শন কৰাক লৈ সন্দেহো কৰিছে একাংশই৷ কিয়নো পাকিস্তানত নিৰ্বাচন সমাগত৷ নিৰ্বাচনৰ আগমুহূৰ্তত হিন্দু ভোটাৰসকলক আকৃষ্ট কৰোৱাৰ এইয়া এক কৌশল নেকি বুলিও চৰ্চা চলা পৰিলক্ষিত হৈছে৷ উল্লেখ্য যে পাকিস্তানৰ ৰাজধানী ইছলামাবাদত বৰ্তমানলৈ হিন্দুসকলৰ বাবে কোনো শ্মশান বা মন্দিৰ নাই৷ হিন্দুলোকসকলে পূজা-পাঠ ঘৰতে কৰাৰ দৰেই সৎকাৰো নিজা বাসগৃহ চৌহদতে কৰিব লগা হয়৷ শেহতীয়াভাৱে প্ৰধানমন্ত্ৰী ইমৰাণ খানৰ সিদ্ধান্তক লৈ যথেষ্ট আশাবাদী হৈ উঠিছে ইছলামাবাদত বাস কৰা হিন্দুসকল৷