ডিজিটেল ডেস্কঃ উত্তৰ পূৰ্বাঞ্চলৰ ভিতৰতে আগশাৰীৰ গুৱাহাটী বাণিজ্য মহাবিদ্যালয়ত বৃহস্পতিবাৰে অনুষ্ঠিত হোৱা ছাত্ৰ একতা সভা নিৰ্বাচনত অখিল ভাৰতীয় বিদ্যাৰ্থী পৰিষদৰ প্ৰাৰ্থীয়ে আটাইকেইটা পদতে জয়লাভ কৰে। সৰ্বমুঠ ১২টা পদৰ ১২ টাতে জয়লাভ কৰিছে অখিল ভাৰতীয় বিদ্যাৰ্থী পৰিষদে।

বৃহস্পতিবাৰে অনুষ্ঠিত নিৰ্বাচনত সভাপতিৰ পদত কল্পজ্যোতি চৌধুৰী, সাধাৰণ সম্পাদক পদত হীৰকজ্যোতি তালুকদাৰ, উপ সভাপতি পদত মামনি বড়ো, সহ-সাধাৰণ সম্পাদকৰ পদত স্বপ্নীল দাস, সমাজসেৱা সম্পাদকৰ পদত চিন্ময় ডেকা, সাংস্কৃতিক সম্পাদকৰ পদত দীপাঞ্জলী কলিতা, গুৰু ক্ৰীড়া সম্পাদক পদত নয়নমনি কুমাৰ দাস, লঘু ক্ৰীড়া বিভাগত ব্ৰাঞ্জিল দৈমাৰী, ছাত্ৰী জিৰণি কোঠা সম্পাদিকা পদত ৰিছা নাৰ্জাৰী, ছাত্র জিৰণি কোঠা সম্পাদক পদত বিবেক চেত্ৰী, সাহিত্য আৰু আলোচনী সম্পাদকৰ পদত আকাশ থাপা, শৰীৰচৰ্চা সম্পাদক পদত শান্তনু দাস, তৰ্ক সম্পাদকৰ পদত ড’না সৰকাৰে জয়লাভ কৰে।

সভাপতি, উপ-সভাপতি, শৰীৰচৰ্চা সম্পাদক, সমাজসেৱা সম্পাদক, তৰ্ক সম্পাদক, ছাত্র জিৰণি কোঠা সম্পাদক পদত অখিল ভাৰতীয় বিদ্যাৰ্থী পৰিষদৰ প্ৰাৰ্থীয়ে বিনা প্ৰতিদ্বন্দিতাৰে জয়লাভ কৰে। জয়লাভৰ পিছতেই অখিল ভাৰতীয় বিদ্যাৰ্থী পৰিষদ, অসম প্ৰদেশৰ সম্পাদক সীমান্ত কুমাৰ বৈশ্যই কয় যে, ‘এয়া ৰাষ্ট্ৰবাদৰ জয়। অসমৰ ছাত্র সমাজে শিক্ষানুষ্ঠানৰ পৰিসৰত বিদ্যায়তনিক , অনুশাসিত আৰু ৰাষ্ট্ৰভক্তিৰ পৰিৱেশ ৰচনাৰ বাবে বিদ্যাৰ্থী পৰিষদক আদৰি লৈছে। এয়া ৰাষ্ট্ৰবাদৰ বাবে ইতিবাচক দিশ।’ বিদ্যাৰ্থী পৰিষদক আকোঁৱালি লোৱাৰ বাবে অখিল ভাৰতীয় বিদ্যাৰ্থী পৰিষদ, অসম প্ৰদেশৰ তৰফৰ পৰা গুৱাহাটী বাণিজ্য মহাবিদ্যালয়ৰ ছাত্ৰ-ছাত্ৰী সকলক ধন্যবাদো জনাই সম্পাদকগৰাকীয়ে।

অখিল ভাৰতীয় বিদ্যাৰ্থী পৰিষদৰ অসম প্ৰদেশৰ সভাপতি অধ্যাপক ৰবীন কাকতি, ৰাষ্ট্ৰীয় সম্পাদক ৰাকেশ দাস , উত্তৰ পূৱ ক্ষেত্ৰৰ সাংগঠনিক সম্পাদক নীৰৱ ঘিলানী, অসম প্ৰদেশৰ সাংগঠনিক অনুপ কুমাৰে জয়লাভ কৰা সকলো ছাত্র-নেতাকে অভিনন্দন জনাই। উল্লেখনীয়ভাৱে ২০১৫ চনৰে পৰা ধাৰাবাহিকভাৱে AVBP-য়ে নিজ দখলত ৰাখিছে গুৱাহাটী কমাৰ্চ কলেজৰ ছাত্ৰ একতা সভাক।