ডিজিটেল ডেস্কঃ নিশা বন্ধু অথৱা বান্ধৱীৰ সৈতে ফুৰিবলৈ যোৱাৰ অভ্যাস আছে নেকি? সাৱধান হওক৷ যোৱাৰ পথত আপোনাৰ ৰৈ থাকিব পাৰে মৃত্যু৷ বান্ধৱীৰে ফুৰিবলৈ গৈয়ে প্ৰাণ হেৰুৱালে এজন যুৱকে৷ নিশা ২বজাত বান্ধৱীৰে ফুৰি উভতাৰ পথতেই চুৰ বুলি সন্দেহতেই গণৰোষত পৰি প্ৰাণ হেৰুৱালে অভীক মুখ্যপাধ্যায় নামৰ যুৱকজনে৷ ৩৫ বছৰীয়া অভীকে তেওঁৰ বান্ধৱী প্ৰিয়ংকাৰ সৈতে পশ্চিমবংগৰ নেতাজী নগৰলৈ ফুৰিবলৈ গৈছিল৷ সেয়াই শেষ ফুৰা৷ নিশা ফুৰিবলৈ যোৱাৰ বাটতেই অঞ্চলটোৰ বৰইপুৰ থানাৰ ওচৰতে গাওঁবাসীয়ে যুৱক-যুৱতীহালক গণপ্ৰহাৰ কৰে৷ একাংশ গাঁওবাসীৰ গণপ্ৰহাৰৰ বলি হৈ সংকটজনক অৱস্থাত আৰক্ষীয়ে দুয়োকে উদ্ধাৰ কৰে যদিও চিকিৎসকে অভিকক মৃত ঘোষণা কৰিছে৷

প্ৰাপ্ত তথ্য অনুসৰি প্ৰিয়ংকা এগৰাকী বাৰ ডান্সাৰ৷ প্ৰিয়ংকাৰে অভিকৰ ভাল বন্ধুত্ব৷ নিশা বান্ধৱীক ফুৰাবলৈ নিয়াটোৱেই অভিকৰ জীৱনৰ শেষ সিদ্ধান্ত হৈ পৰিল৷ প্ৰিয়ংকাৰ অৱস্থাও সংকটজনক বুলি প্ৰকাশ কৰিছে চিকিৎসকে৷ তাৰ মাজতেই ঘটনা সম্পৰ্কে আৰক্ষীয়ে জনোৱা অনুসৰি বিশেষ গাঁওখনৰ প্ৰায়সংখ্যক লোককেই ইতিমধ্যে আৰক্ষীয়ে আটক কৰি জেৰা আৰম্ভ কৰিছে৷ ইফালে অভিকৰ পৰিয়ালে দাবী কৰা অনুসৰি এইয়া পৰিকল্পিত হত্যাকাণ্ড৷ গাওঁবাসীয়ে জেৰাত প্ৰকাশ কৰা অনুসৰি প্ৰিয়ংকাই নিশা গাওঁৰ কোনো এঘৰ লোকৰ গৃহত প্ৰৱেশ কৰিছিল যাৰ বাবেই এই গণপ্ৰহাৰ৷ সত্য কোন? আৰক্ষীয়ে বৰ্তমানো এই সম্পৰ্কে কোনো তথ্য উলিয়াব পৰা নাই৷ শেহতীয়াভাৱে বিষয়টোক লৈ উচ্চ পৰ্যায়ৰ তদন্তৰো ব্যৱস্থা কৰিছে আৰক্ষীয়ে৷