মানৱ শৰীৰৰ স্বাস্থ্য আৰু সৌন্দৰ্যৰ বিঘিনি ঘটাৰ ভালেমান কাৰণ থাকিব পাৰে৷ তাৰে ভিতৰত দুটা অন্যতম হল- চিন্তা আৰু অধিক পৰিশ্ৰম৷ প্ৰায় সকলোৰে জীৱনত চিন্তা থাকেই কিন্তু দেখা যায় যে কিছুমান লোকৰ জীৱনত অতিমাত্ৰা চিন্তা আছে বা তেওঁলোকে অতিমাত্ৰা চিন্তা কৰে৷ বৰ্তমান সময়ত এনেকুৱা বহুতৰ ক্ষেত্ৰত হোৱা দেখা যায় যে অত্যাধিক চিন্তা, অপৰিসীম দায়িত্ব, পৰিশ্ৰম মানুহৰ লগৰী৷ এই চিন্তা, পৰিশ্ৰমৰ বাবেই নজনাকৈয়ে যেন নিজৰ জীৱনটো বোজা হৈ পৰে৷ কিছুমান এনে মহিলা বা পুৰুষো আছে যিবোৰে সামান্য সমস্যা এটাকো মূৰ পাতি লৈ অশান্তিত ভুগি থাকে৷ সামান্য সমস্যা এটাৰো মুখামুখী হোৱাৰ সাহস যেন নাই, এনেবোৰ মানুহৰ জীৱনত সুখতকৈ বেছি দুখহে হয়৷ বহুত মানুহ এনেকুৱাও আছে যিবোৰে সমস্যাৰ মুখামুখী হব নোৱাৰি আত্মহত্যাৰ পথো বাছি লয়৷ গতিকে এই চিন্তা, পৰিশ্ৰম, সমস্যা সমূহৰ পৰা আতৰিঁ থাকি মুক্তভাৱে উশাহ লব খোজে সেইসকললৈ কেইটামান পদক্ষেপ আগবঢ়োৱা হল-

১. যদি অনুভৱ কৰে যে আপোনালোকৰ জীৱনত কোনো চিন্তাৰ সৃষ্টি হৈছে নাইবা সমস্যাৰ সৃষ্টি হৈছে৷ তেনেস্থলত সেই চিন্তাৰ পৰা মনটোক আতঁৰাই অনাই আন কথালৈ সলনি কৰাৰ চেষ্টা কৰিব লাগে৷ কোনো ভাললগা বন্ধুৰ সতে কিছুসময় আলাপ কৰি মনটো পাতলাই তুলিব পাৰে৷
২. অফিচত কাম কৰা সকলে চিন্তাৰ পৰা তৎক্ষণাত নিজক মুক্ত কৰিবলৈ হলে বহি থকা ঠাইৰ পৰা অলপ উঠি আন এটা কামত ব্যস্ত পৰিব লাগে৷ আৰু যদিহে ঘৰত থাকে তেন্তে নিজৰ পছন্দৰ কাম উলিয়াই কৰিব লাগে৷ কি কথাত গুৰুত্ব দিব লাগে, কি কথাত নালাগে সেইটো মনৰ মাজত নিজেই নিৰ্ধাৰণ কৰি লওঁক, তাতেই অযথা চিন্তাৰ পৰা মুক্তি পোৱাৰ পথ বিচাৰি পাব৷
৩. কোনো মুকলি ঠাইত খোজ কাঢ়ি মনটো মুকলি কৰিবলৈ চেষ্টা কৰিব লাগে৷ ঘৰৰ ভিতৰত থাকিলে খোলা খিৰিকীৰ মুখত থিয় দি দীঘলকৈ উশাহ লৈ এৰি দিয়ক৷ তৎক্ষণাত চিন্তাৰ পৰা মুক্তি পাবলৈ এই প্ৰাণায়াম উপকাৰী৷
৪. যিটো কথাই আমনি কৰি আছে সেই কথাটো কিমান গুৰুত্বপূৰ্ণ, তাত অধিক মনোযোগ দিয়াটো উচিতনে, সেই কথা জুকিয়াই লোৱাটো উচিত৷ আৰু যদিহে গুৰুত্ব দিবলগীয়া নহয় তেন্তে সেই বিষয়টো লৈ মূৰ ঘমাই লাভ নাই৷ জীৱনত এনে সৰু বৰ সমস্যা আহেই বুলি ভাবি
সাহসেৰে জীৱনত আগুৱাই যাব লাগিব৷