ডিজিটেল ডেস্কঃ ২০২২ চনত সমগ্ৰ দেশৰ লগতে অসমৰ কৃষকৰো আয় দুগুণ হ’ব৷ প্ৰধান মন্ত্ৰী নৰেন্দ্ৰ মোদীয়ে ভাৰতক এখন সমৃদ্ধিশালী ৰাষ্ট্ৰ হিচাপে গঢ় দিয়াৰ যি সপোন দেখিছে সেই সপোন বাস্তৱ হোৱাৰ পথত৷ কৃষক সমৃদ্ধিশালী নহলে, দেশ সমৃদ্ধিশালী নহয়৷ কৃষকক সমৃদ্ধিশালী কৰাৰ বাবে প্ৰধানমন্ত্ৰীয়ে দেখা সপোনক বাস্তৱায়িত কৰাৰ লক্ষ্য আগত ৰাখিয়েই অসমতো হিমন্ত বিশ্ব শৰ্মাৰ সৱল নেতৃত্বত আৰম্ভ হৈছে কৃষি বিপ্লৱ৷ উচ্ছেদিত গৰুখুটি অঞ্চলৰ পৰাই আৰম্ভ হৈছে এই কৃষি বিপ্লৱৰ৷ কৃষিৰ লগতে পশুপালনেৰেও অসমৰ কৃষক স্বাৱলম্বী হ’ব পাৰে৷ ইতিমধ্যেই গুজৰাটৰ পৰা অনা ১০৮ টা গিৰ গাইৰে গৰুখুঁটিত দুগ্ধ বিপ্লৱো আৰম্ভ হৈছে৷

অসমৰ কৃষকে অন্য ৰাজ্যৰ কৃষকৰ লগত ফেৰ মাৰিব পৰাকৈ টনকীয়াল হৈ উঠিব৷ নতুন বছৰত দুগুণলৈ বৃদ্ধি পাব অসমৰ কৃষকৰ আয়৷ অসমৰ কৃষিক্ষেত্ৰক নতুন মাত্ৰা প্ৰদানৰ লক্ষ্য আগত ৰাখিয়েই ৰাজ্যিক বিজেপিয়ে গঠন কৰিব ‘কৃষক উৎপাদক সংগঠন’ (FPO)৷ কৃষক উৎপাদক সংগঠনটোৰ নিৰীক্ষণ তথা তদাৰকৰ বাবে এখন ৫ জনীয়া সমিতি গঠন কৰা হৈছে৷

উল্লেখ্য যে, কৃষকক সহায়ৰ বাবে গঠন কৰা এফপিঅ’ৰ বিষয়টো নিৰীক্ষণৰ বাবে বৃহস্পতিবাৰে ৫ জনীয়া সমিতি গঠন কৰা হৈছে৷ এই সমিতিখনত ৰাজ্যিক বিজেপিৰ উপ-সভাপতি অশোক ভট্ট ৰায়, কিষাণ মৰ্চাৰ ৰাষ্ট্ৰীয় উপ-সভাপতি প্ৰান কুমাৰ দাস, ৰাজ্যিক বিজেপিৰ কাৰ্যনিৰ্বাহক সদস্য প্ৰফুল্ল বৰা, কিষাণ মৰ্চাৰ ৰাজ্যিক উপ-সভাপতি ঋষিৰাজ হাজৰিকাকে ধৰি কিষাণ মৰ্চাৰ ৰাজ্যিক সাধাৰণ সম্পাদিকা ইন্দ্ৰাণী তহবিলদাৰো আছে বুলি জানিব পৰা গৈছে৷ অৱশ্যে ‘কৃষক উৎপাদক সংগঠন’ (FPO)ৰ কাম কেতিয়াৰে পৰা আৰম্ভ হ’ব সেই কথা বৰ্তমানো স্পষ্ট হোৱা নাই৷