আজি ২১ ফেব্ৰুৱাৰী, সমগ্ৰ বিশ্বতেই আজিৰ দিনটোত প্ৰতিবছৰে পালন কৰা হয় আন্তজাৰ্তিক মাতৃভাষা দিৱস। আন্তজাৰ্তিক মাতৃভাষা দিৱসে এজন ব্যক্তিৰ মাতৃভাষাই এগৰাকী ব্যক্তিৰ পৰিচয় নিৰূপণ কৰাত সহায় কৰে বুলি কোৱা হয়। সভ্যতা আৰু সংস্কৃতিৰ মেৰুদণ্ড স্বৰূপ হৈছে মাতৃভাষা। একোটা জাতি তথা এখন সমাজৰ বাবে দাপোনস্বৰূপ মাতৃভাষা। মাতৃভাষা দিৱস কিয় পালন কৰা হয় বুলি যদি প্ৰশ্ন কৰা হয় তেন্তে হয়তো সেই প্ৰশ্নৰ উত্তৰ দি শেষ নহব।
নিজৰ মাতৃভাষাৰ বহুল প্ৰচলনৰ বাবে, মাতৃভাষাৰ সংৰক্ষণৰ বাবে, মাতৃভাষাৰ স্বকীয়তাৰ স্বীকৃতিৰ বাবে পালন কৰা হয় আন্তজাৰ্তিক মাতৃভাষা দিৱস।
এই বিশেষ দিনটোত মুখ্যমন্ত্ৰী হিমন্ত বিশ্ব শৰ্মাই ছচিয়েল মিডিয়া যোগে জনাই আন্তজাৰ্তিক মাতৃভাষা দিৱস। মুখ্যমন্ত্ৰী হিমন্ত বিশ্ব শৰ্মাই লিখিছে, ‘প্ৰতিগৰাকী ব্যক্তিৰে নিজ মাতৃভাষা স্বাভিমান স্বৰূপ। যি ভাষাত দেখোঁ সপোন, যি ভাষা মোৰ আইৰ ভাষা, যি ভাষাক লৈ গৌৰৱান্বিত হৈ পৰোঁ বাৰে বাৰে, সেই মাতৃভাষা মোৰ আপোনৰো
আপোন। আজি আন্তজাৰ্তিক মাতৃভাষা দিৱসত সকলো মাতৃভাষাৰ প্ৰতি শ্ৰদ্ধাশীল হোৱাৰ আশাৰে উষ্ম শুভকামনা জ্ঞাপন কৰিলোঁ’।
উল্লেখ্য যে, ভাষিক আৰু সাংস্কৃতিক বৈচিত্ৰ তথা বহুভাষাবাদৰ বিষয়ে সজাগতা সৃষ্টিক উদগনি যোগাবৰ বাবে প্ৰতিবছৰে ২১ ফেব্ৰুৱাৰী দিনটোক আন্তজাৰ্তিক মাতৃভাষা দিৱস হিচাপে পালন কৰা হয়। ১৯৯৯ চনৰ ১৭ নৱেম্বৰত ইউনেস্কোই প্ৰথম এই দিৱসৰ কথা ঘোষণা কৰে। ১৯৯৯ চনত এই দিৱসৰ কথা ঘোষণা কৰা পিছত ২০০০ চনত ৰাষ্ট্ৰসংঘৰ সদস্য দেশসমূহে ২১ ফেব্ৰুৱাৰীক যথাযথ মৰ্যদাৰে পালন কৰে এই দিনটো৷