ডিজিটেল ডেস্কঃ  ১৯৮৮ চন৷ মীৰা নায়াৰৰ চিনেমা ছালাম বম্বে৷ ছালাম বম্বে তেতিয়া সকলোৰে মুখে মুখে চৰ্চিত এখন চিনেমা৷ তাৰেই এটা চৰিত্ৰত এজন সৰু লৰা৷ বয়স হয়তো ১৮-২০ বছৰীয়া হ’ব৷ চিনেমাখন চাওঁতে বহুতৰে চকুত পৰিছেও, হয়তো পৰাও নাই সেই বিশেষ লৰাজন৷ কেই চেকণ্ডৰ বাবেহে লৰাজনক দেখা যায়৷ ৰাস্তাৰ কাষত বহি লৰাজনে অন্যৰ চিঠিসমূহ লিখাৰ কাম কৰে৷ তাতেই লৰাজনৰ এটা বিশেষ ডাইলগ, ‘হ’ব হ’ব ১০ লাইন লিখা হ’ল, আৰু লিখিবলৈ হ’লে ৫০ পইচা আৰু দিব লাগিব৷ মাৰ নাম এড্ৰেছ কওক?’

কেই চেকণ্ডৰ বাবে পৰ্দাত দেখি প্ৰায়সংখ্যকেি পাহৰি যোৱা লৰাজনেই আছিল ইৰফান খান৷ খুৱ কমসংখ্যকেই হয়তো ভাৱিছিল এই বিশেষ লৰাজনেই এদিন দেশৰ আগশাৰীৰ অভিনেতা হ’ব৷ ১৯৬৭ চনত এখন সৰু গাওঁত জন্মগ্ৰহণ কৰা ইৰফান খানে এক সাক্ষাৎকাৰত কৈছিল, ‘মিথুন চক্ৰবৰ্তীৰ চিনেমা মৃগয়া খুব চলিছিল, মৃগয়া চাই গাঁৱৰ একাংশই কৈছিল তোৰ চেহেৰা মিথুনেৰে মিল আছে৷ সেইদিনাই অভিনয়ৰ দিশে ঢাল খাইছিল মন৷ কিছুদিনলৈ নিজকে মিছুন সজাইয়ো ঘূৰি ফুৰিলো৷ যাত্ৰা তেতিয়াই আৰম্ভ হ’ল৷’

তাৰ পিছত কাহানিও থমকি ৰোৱা নাই ইৰফান৷ বলীউডৰ পৰা হলীউডলৈ ইৰফানৰ এটা যুগ৷ অস্কাৰ বিজয়ী চিনেমা শ্লামডগ মিলিয়লাৰকে ধৰি বহু আগশাৰীৰ চিনেমাত ইৰফানৰ বলিষ্ঠ অভিনয়৷ এই যাত্ৰাৰ উত্থান-পতনবোৰে কাহানিও টলাব নোৱাৰিছিল ইৰফানক৷ কিন্তু দুৰাৰোগ্য ৰোগে ইৰফানক আৰু সুযোগ নিদিলে৷

২০২০ চনৰ ২৯ এপ্ৰিল তাৰিখে চিৰদিনৰ বাবে স্তব্ধ হৈ পৰিল এটা যুগৰ৷ ৫৩ বছৰ বয়সতে সকলোৰে পৰা চিৰবিদায় মাগিলে তাৰকা ইৰফানে৷ ইৰফান খানৰ মৃত্যুৰ ২বছৰ, তেওঁৰ মৃত্যু তিথিত আজিও দেশবাসীয়ে শ্ৰদ্ধাৰে সোঁৱৰিছে বলিষ্ঠ তাৰকা অভিনেতা ইৰফান খানক৷