আৰক্ষী কনিষ্টবল নিযুক্তিৰ পৰীক্ষাত আবেদনময়ী অভিনেত্রী ‘ছানী লিয়নি’ বহাক লৈ উত্তৰ প্ৰদেশত ব্যাপক চাঞ্চল্য আৰু প্রতিক্রিয়াৰ সৃষ্টি হৈছে। দেওবাৰে অনুষ্ঠিত হোৱা পৰীক্ষাত ৬০,২৪৪ পদৰ বাবে প্রায় ৪৮ লাখ প্রার্থীয়ে পৰীক্ষা দিয়ে। ইয়াৰে ১৫ লাখ যুৱতী। ইয়াৰ মাজতে এখন এডমিট কার্ডত ছানী লিয়নিৰ নাম আৰু ফটো সন্নিবিষ্ট হোৱাটো ধৰা পৰাত বিভাগত তোলপাৰ লাগে। কনৌজ জিলাৰ শ্ৰীমতী সোণশ্রী স্মাৰক বালিকা মহাবিদ্যালয়ৰ পৰীক্ষাগৃহত এখন আসন খালী আছিল। বিভাগে পৰীক্ষাত নবহা পৰীক্ষাৰ্থীজনৰ সবিশেষ তথ্য চালি-জাৰি চোৱাৰ পিচতে এডমিট কার্ডত ছানী লিয়নিৰ নাম-ফটো ধৰা পৰে। ইয়াৰ পিচতে আৰক্ষীৰ চাই বাৰ শাখাই এই ঘটনাৰ তদন্ত আৰম্ভ কৰিছে। আবেদনপত্রখন কাছগঞ্জ জিলাত কৰা হৈছিল।