সমগ্ৰ বিশ্বৰ ক্ৰিকেট অনুৰাগীৰ বাবে এক সুন্দৰ খবৰ। ইণ্ডিয়ান প্ৰিমিয়াৰ লীগ (আই পি এল) ২০২৫ৰ তাৰিখ ঘোষণা। এইবাৰ ২৩ মাৰ্চৰ পৰা আৰম্ভ হ’ব প্ৰতিযোগিতা। এই কথা নিশ্চিত কৰিছে ভাৰতীয় ক্ৰিকেট নিয়ন্ত্ৰণ ব’ৰ্ডৰ উপ-সভাপতি ৰাজীৱ শুক্লাই। মুম্বাইত বি চি চি আইৰ বিশেষ বাৰ্ষিক সভা (এছ জি এম)ৰ পিছত তেওঁ এই তথ্য দিয়ে।

ফাইনেল কেতিয়া অনুষ্ঠিত হ’ব?

সংবাদ সংস্থা এএনআইৰ সৈতে কথা পাতি ৰাজীৱ শুক্লাই কয় যে উদ্বোধনী খেলখনৰ তাৰিখ ২৩ মাৰ্চ। যিহেতু ইণ্ডিয়া টুডেৰ প্ৰতিবেদন অনুসৰি ফাইনেলৰ তাৰিখ ২৫ মে’ নিৰ্ধাৰণ কৰা হৈছে। ২২ মাৰ্চৰ পৰা আৰম্ভ হোৱা আই পি এল ২০২৪ত আৰ চি বি আৰু চি এছ কেৰ মুখামুখি হৈছিল আৰু ২৬ মে’ত ফাইনেল অনুষ্ঠিত হৈছিল য’ত কে কে আৰ য়ে ট্ৰফী লাভ কৰিছিল। আনহাতে, স্প’ৰ্টষ্টাৰৰ প্ৰতিবেদন অনুসৰি এইবাৰ কলকাতাৰ ইডেন গাৰ্ডেনত অনুষ্ঠিত হ’ব চূড়ান্ত খেল।

বিচিচিআইৰ বৈঠকত ডাঙৰ ডাঙৰ সিদ্ধান্ত

আজিৰ বি চি চি আইৰ বৈঠকত নতুন কোষাধ্যক্ষ আৰু সম্পাদক নিযুক্তি সন্দৰ্ভত গুৰুত্বপূৰ্ণ সিদ্ধান্ত গ্ৰহণ কৰা হয়। দেৱজিৎ শইকীয়াক নতুন সম্পাদক আৰু প্ৰভতেজ সিং ভাটিয়াক নতুন কোষাধ্যক্ষ হিচাপে নিৰ্বাচিত কৰা হৈছে। মহিলা প্ৰিমিয়াৰ লীগ (ডব্লিউ পি এল)ৰ স্থান সন্দৰ্ভত প্ৰায় স্পষ্টতা দেখা গৈছে। ইয়াৰ উপৰিও আইপিএলে এবছৰৰ বাবে নতুন আয়ুক্ত নিযুক্তিৰ কথা ঘোষণা কৰিছে। ১৮-১৯ জানুৱাৰীত অনুষ্ঠিত হ’বলগীয়া পৰৱৰ্তী বৈঠকত চেম্পিয়নছ ট্ৰফীৰ বাবে চূড়ান্ত দল নিৰ্বাচনৰ ওপৰত গুৰুত্ব আৰোপ কৰা হ’ব।

চৌদি আৰৱত অনুষ্ঠিত হয় এই নিলাম

ছৌদি আৰৱৰ জেদ্দাত দুদিন ধৰি চলি থকা আই পি এল ২০২৫ৰ মেগা নিলামত মুঠ ১৮২ গৰাকী খেলুৱৈ ৬৩৯.১৫ কোটি টকাত বিক্ৰী হয়। ১০টা দলৰ অধিকাংশই নিজৰ মূল খেলুৱৈক ধৰি ৰখাৰ পিছত নিজৰ দল শক্তিশালী কৰাত মনোনিৱেশ কৰিছিল। ভাৰতৰ উইকেটকীপাৰ-বেটছমেন ঋষভ পণ্টে ২৭ কোটি টকাত বিক্ৰী কৰি আই পি এলৰ ইতিহাসৰ আটাইতকৈ ব্যয়বহুল খেলুৱৈ হিচাপে পৰিগণিত হয়, তাৰ পিছতে আছে শ্ৰেয়াছ আয়াৰ (২৬.৭৫ কোটি) আৰু ভেংকটেশ আয়াৰ (২৩.৭৫ কোটি টকা)। ইফালে ডেভিদ ৱাৰ্নাৰ, পৃথ্বী শ্ব’ আৰু শ্বাৰদুল ঠাকুৰৰ দৰে খেলুৱৈয়ে কোনো ধৰণৰ বিড নোপোৱাৰ বাবে বিক্ৰী নোহোৱাকৈয়ে আছে।