কেৰিয়াৰ দ্বিতীয়খন মেচতে মেন অৱ দ্য মেচৰ খিতাপ জয়ী কৰি সকলোৰে প্ৰশংসাৰ পাত্ৰ হৈ পৰিল যুৱক্ৰিকেটাৰ ধ্ৰুৱ জুৰেল। শেহতীয়াকৈ ৰাঞ্চীত অনুষ্ঠিত হোৱা ইংলেণ্ডৰ বিৰুদ্ধে ভাৰতৰ চতুৰ্থখন টেষ্ট ছিৰিজত বিজয়ৰ মুকুট পিন্ধবলৈ সক্ষম হৈছে ভাৰতীয় ক্ৰিকেট দলটিয়ে। চতুৰ্থখন টেষ্ট ছিৰিজত নিজৰ দুৰ্দান্ত প্ৰদৰ্শনেৰে ইংলেণ্ডক ধূলিসাৎ কৰি পেলাইছিল যুৱ ক্ৰিকেটাৰ ধ্ৰুৱ জুৰেলে। প্ৰথম ইনিংছত ধ্ৰুৱ জুৰেলে যদি ৯০ ৰান সংগ্ৰহ নকৰিলে হয়, তেতিয়া হ’লে হয়তো ভাৰতে বিজয়ৰ মুখ নেদেখিলে হয়। আনহাতে দ্বিতীয় ইনিংছতো দলটোক জয়ী কৰিহে তেওঁ খেলপথাৰ এৰি থৈ যায়। সেইবাবেই জুৰেলক মেন অৱ দ্য মেচ হিচাপে ঘোষণা কৰা হৈছে। জুৰেলে ৯০ ৰানৰ পথত লৱাৰ অৰ্ডাৰৰ বেটছমেনৰ সৈতে যুটি বান্ধে। সেই কাৰণে তেওঁ কেৱল নিজৰেই নহয়, আনকো সমান কৃতিত্ব দিছে। দ্বিতীয় ইনিংছতো ভাৰতে ১২০ ৰানত ৫ উইকেট হেৰুৱাই গভীৰ চাপত পৰিছিল, যাৰ বাবে দলটোক জয়ী হ’বলৈ প্ৰয়োজন হৈছিল ৭২ ৰানৰ। জুৰেলে শুভমন গিলৰ সৈতে সেয়া অতিক্ৰম কৰিলে। ধ্ৰুৱ জুৰেলক দেখিলে এনেকুৱা নালাগে যে তেওঁৰ কেৰিয়াৰৰ এইখন দ্বিতীয় টেষ্ট মেচ আছিল য’ত তেওঁৰ নিজৰ সাৱলীল প্ৰদৰ্শন দাঙি ধৰিবলৈ সক্ষম হৈছিল।