চৰকাৰ গঠনৰ দুদিন পূৰ্বে অসমত নায়েব সিং চৈনীৰ উপস্থিতিক লৈ দেশৰ ৰাজনৈতিক পৰিমণ্ডলত এতিয়া ব্যাপক চৰ্চা হোৱা পৰিলক্ষিত হৈছে একেদৰে দেশৰ ৰাজনীতিত এয়া এক উল্লেখযোগ্য ঘটনা হিচাপেও পৰিগণিত হৈছে৷ কাৰণ বৰ্তমানো হাৰিয়ানাত চৰকাৰ গঠন হোৱাই নাই। হিন্দী বলয়ৰ গুৰুত্বপূৰ্ণ ৰাজ্যখনত পুনৰ গেৰুৱা শিবিৰে বাজিমাৎ মাৰিছে লগে লগে তৃতীয় বাৰৰ বাবে চৰকাৰ গঠনৰ বাবে তৎপৰতাৰে আগবাঢ়িছে গেৰুৱা শিবিৰ৷ অহা ১৭ অক্টোবৰত হাৰিয়ানাৰ মুখ্যমন্ত্ৰীৰূপে শপত ল’ব নায়েব সিং চৈনীয়ে৷ অৰ্থাৎ মুখ্যমন্ত্ৰীৰ দায়িত্ব লোৱাৰ বাবে মাজত মাঁথো দুদিন৷ কিন্তু যিখিনি সময়ত চৰকাৰ গঠনৰ কুচকাৱাজত তৎপৰতাৰে কাম কৰিব লাগে চৈনীয়ে সেই একেইখিনি সময়ত হাৰিয়ানাৰ ভাবী মুখ্যমন্ত্ৰীগৰাকীক দেখিবলৈ পোৱা গ’ল অসমত৷ এইখিনিতেই উল্লেখ নকৰি নোৱাৰি এইবাৰ হাৰিয়ানাৰ কেইবাটাও সমষ্টিত জোৰদাৰ নিৰ্বাচনী প্ৰচাৰ চলাইছিল অসমৰ মুখ্যমন্ত্ৰী ড° হিমন্ত বিশ্ব শৰ্মাই৷ মুখ্যমন্ত্ৰী ড০ হিমন্ত বিশ্ব শৰ্মাই প্ৰচাৰ চলোৱা হাৰিয়ানাৰ প্ৰায়বোৰ সমষ্টিতেই ইতিমধ্যে জয়ী হৈছিল বিজেপি প্ৰাৰ্থীসমূহ৷ খবৰ অনুসৰি, নিৰ্বাচনী প্ৰচাৰৰ সময়তেই দুয়োগৰাকী মুখ্যমন্ত্ৰীৰ মাজত গঢ়ি উঠিছিল মধুৰ সম্পৰ্ক৷ ৰাজনৈতিক বিশ্লেষকসকলৰ মতে আগত দিনত হাৰিয়ানা আৰু অসমৰ অৰ্থনৈতিক সম্পৰ্ক আৰু অধিক গাঢ় হ’ব৷ আনহাতে অসমত উপস্থিত হোৱা নায়েব সিং চৈনীয়ে মুখ্যমন্ত্ৰী ড০হিমন্ত বিশ্ব শৰ্মাৰ জনহিতৈষী কামসমূহক প্ৰশংসা কৰাও দেখিবলৈ পোৱা গ’ল৷ ইয়াৰ পৰা ধাৰণা কৰিব পাৰি যে, মুখ্যমন্ত্ৰী ড০ হিমন্ত বিশ্ব শৰ্মাক কৃতজ্ঞতা জ্ঞাপন কৰাৰ বাবেই হয়তো শপত গ্ৰহণৰ মাত্ৰ দুদিন পূৰ্বে অসমত উপস্থিত হৈছে নায়েব সিং চৈনী৷ কিন্তু যিয়েই নহওঁক অনাগত ভৱিষ্যতত নায়েব সিং চৈনী আৰু মুখ্যমন্ত্ৰী ড০ হিমন্ত বিশ্ব শৰ্মাই ৰাষ্ট্ৰীয় ৰাজনীতিত যে কিবা ডাঙৰ পৰিকল্পনা কৰিছে সেয়া এতিয়া নিশ্চিত হৈ পৰিছে৷