ডিজিটেল ডেস্কঃ সাহিত্যিক, কথাশিল্পী ইমৰাণ শ্বাহক আনুষ্ঠানিক ভাৱে প্ৰদান কৰা হৈছে পদ্মশ্ৰী সন্মান। শনিবাৰে কথাশিল্পী গৰাকীৰ শিৱসাগৰৰ ধাইআলিস্থিত বাসগৃহত প্ৰদান কৰা হৈছে এই বঁটা।

শিৱসাগৰৰ জিলা উপায়ুক্ত মেঘনিধি দাহালে উপস্থিত হৈ এই সন্মান প্ৰদান কৰে বিশিষ্ট সাহিত্যিকগৰাকীক। শাৰীৰিক অসুস্থতাৰ বাবে নতুন দিল্লীৰ বঁটা প্ৰদান অনুষ্ঠানত অংশগ্ৰহণ কৰিব পৰা নাছিল ইমৰাণ শ্বাহে। এই বঁটালাভ কৰি যথেষ্ট সুখী বুলিও মন্তব্য প্ৰদান কৰিছে কথাকবি গৰাকীয়ে।

উল্লেখ্য যে ক্ৰান্তিৰেখা, বন্ধ দুৱাৰ, জাৱানবন্দী, শিখৰ মিনতি, সাগৰীকা, বৰ্ণালী, তানছেং আদি উপন্যাসেৰে অসমীয়া সাহিত্যক চহকী কৰা সাহিত্যিকগৰাকীয়ে এই বঁটা লাভ কৰাৰ পিছতেই উৎফুল্লিত হৈ পৰিছে তেওঁৰ গুণমুগ্ধসকলো। সাহিত্যিক গৰাকীয়ে পদ্মশ্ৰী সন্মান লাভ কৰাৰ পিছতে তেওঁৰ ঘৰত ভিৰ কৰিছে অজস্ৰ শুভাকাংক্ষীয়েও।