ডিজিটেল ডেস্কঃ ইউক্ৰেইনৰ বাবে বিশ্ববেংকে আগবঢ়াইছে ৭২৩ নিযুত ডলাৰ ঋণ আৰু অনুদান পেকেজ৷ বিশ্ববেংক ঋণৰ বাবে অতিৰিক্ত ৩৫০ মিলিয়ন ডলাৰৰ লগতে নেডাৰলেণ্ড আৰু চুইডেনৰ প্ৰায় ১৩৯ মিলিয়ন ডলাৰ আগবঢ়োৱা হৈছে পেকেজটোত৷ ইউক্ৰেইনৰ বাবে এই পেকেজটো পৰিপূৰক বাজেটীয় সাহায্য পেকেজ বুলি অনুমোদিত হৈছে। ইউক্ৰেইনৰ অৰ্থনৈতিক অৱস্থাক পুনৰুদ্ধাৰ কৰিবলৈ লোৱা হৈছে এই পদক্ষেপ৷ অৰ্থনৈতিক জৰুৰীকালীন অৱস্থাৰ পৰা পুনৰুদ্ধাৰৰ বাবে বিত্তীয় যোগান ধৰা হৈছে ৪৮৯ নিযুত ডলাৰ৷ এই পেকেজটোত ব্ৰিটেইন, ডেনমাৰ্ক, লাটভিয়া, লিথুৱানিয়া আৰু আইচলেণ্ডে ১৩৪ নিযুত ডলাৰৰ অনুদান আগবঢ়োৱা হৈছে৷

ইয়াৰ লগতে পেকেজটোত জাপানে আগবঢ়াইছে ১০০ মিলিয়ন ডলাৰ৷ বিশ্ববেংকৰ মুখপাত্ৰই উল্লেখ কৰা অনুসৰি, অহা কেইদিনমানৰ ভিতৰত এই পুঁজি ইউক্ৰেইন চৰকাৰক হস্তান্তৰ কৰা হ’ব। বিশ্ববেংকৰ বাজেট সমৰ্থন ঋণৰ ওপৰত কোনো ধৰণৰ প্ৰতিবন্ধকতা নাই। দেশখনে পুঁজি কেনেদৰে ব্যয় কৰিব লাগে সেই বিষয়ে দেশখনৰ চৰকাৰখনে সিদ্ধান্ত ল’ব পাৰে। বিশ্ববেংকৰ তথ্য অনুসৰি ইউক্ৰেইনৰ এই সময়চোৱাত চিকিৎসালয়ৰ কৰ্মচাৰীসকলক বেতন দিয়া, পেঞ্চন পুঁজি প্ৰদান কৰা আৰু সামাজিক কাৰ্যসূচী অব্যাহত ৰখাত সহায় কৰিব।

বিশ্ববেংকৰ সভাপতি ডেভিদ মালপাছে এক বিবৃতিত জনায় যে “ৰাছিয়াৰ আক্ৰমণৰ ফলত হোৱা হিংসাত্মক ঘটনা আৰু চৰম দুৰ্যোগৰ সন্মুখীন হোৱা ইউক্ৰেইনক বিশ্ববেংকে সহায় কৰিবলৈ দ্ৰুত পদক্ষেপ গ্ৰহণ কৰি আছে। বিশ্ববেংকৰ গোটে ইউক্ৰেইন আৰু ইউক্ৰেইনবাসীৰ সৈতে থিয় দিছে। এই সংকটৰ সময়ত সুদূৰপ্ৰসাৰী মানৱীয়তা আৰু অৰ্থনৈতিক প্ৰভাৱৰ সৈতে যুঁজিবলৈ বিশ্ববেংকে লোৱা পদক্ষেপবোৰৰ ভিতৰত এইটো প্ৰথম। আনহাতে, অনাগত দিনত ইউক্ৰেইনৰ অৰ্থনৈতিক অৱস্থাৰ বাবে পুনৰ ৩ বিলিয়ন ডলাৰ সাহায্য প্ৰদানৰ ওপৰত কাম কৰিব বিশ্ববেংকে৷