ডিজিটেল ডেস্কঃ অসম চৰকাৰৰ পৰিবহন বিভাগে যান-বাহনৰ গৰাকীসকলৰ সুবিধাৰ্থে ৰাজহ আদায় দিয়াৰ সময়সীমা বৃদ্ধি কৰিছে। ৩১ ডিচেম্বৰলৈ এই সময়সীমা বৃদ্ধি কৰা হৈছে। ৰাজহ আদায় সন্দৰ্ভত কামৰূপ মহানগৰ জিলা পৰিবহন বিষয়া গৌতম দাসে জনাই যে, এইবাৰ শেষবাৰৰ বাবে ৰাজহ আদায় দিয়াৰ সময় বৃদ্ধি কৰা হৈছে। সকলো যান-বাহনৰ গৰাকীকে ৩১ ডিচেম্বৰৰ ভিতৰত এই ৰাজহ আদায় দিয়াৰ লগতে গাড়ীৰ নথিসমূহ নবীকৰণ কৰাবলৈও আহ্বান জনাইছে পৰিবহন বিষয়াগৰাকীয়ে।

নথিৰ ক্ষেত্ৰত, ড্ৰাইভিং লাইচেঞ্চ, ইঞ্চুৰেন্স বা বীমা, প্ৰদুষণৰ নথি, ৰেজিষ্ট্ৰেচন আদি নবীকৰণৰো আহ্বান জনাইছে মহানগৰ জিলা পৰিবহন বিষয়াগৰাকীয়ে। ইফালে ১ জানুৱাৰীৰ পৰা এই নথি পৰীক্ষাৰ বাবে পৰিবহন আৰক্ষীয়ে অভিযান চলাব বুলিও জনাইছে বিষয়াগৰাকীয়ে।

উল্লেখ্য যে, কেন্দ্ৰীয় চৰকাৰৰ পথ পৰিবহন মন্ত্ৰণালয়ে যান-বাহনৰ গৰাকীসকলক কৰ আদায় দিয়াৰ বাবে সময়সীমা সাতবাৰকৈ বৃদ্ধি কৰিছে। কভিড পৰিস্থিতিৰ প্ৰতি লক্ষ্য ৰাখিয়েই এই সময়সীমা বৃদ্ধি কৰিছে পৰিবহন মন্ত্ৰণালয়ে। কিন্তু আৰু সময়সীমা বৃদ্ধি কৰা নহ’ব বুলিও জনাইছে পৰিবহন বিষয়াগৰাকীয়ে।