নাৰী সকলৰ ত্যাগ, ধৈৰ্য্য, আত্মবলিদান তথা সমাজৰ প্ৰতি তেওঁলোকৰ অৱদানৰ স্বীকৃতিৰ প্ৰতি উৎসৰ্গিত এটা দিন৷ হিন্দু শাস্ত্ৰ তথা ৰীতি-নীতিত নাৰীক সদায় উচ্চ স্থান দিয়া হৈছে৷ প্ৰতিবছৰে ৮ মাৰ্চত উদযাপন কৰা এই দিনটো বিশ্বৰ মহিলাসকলে তেওঁলোকৰ জীৱন উন্নত কৰিবলৈ লোৱা এক যাত্ৰা৷
নাৰী অনন্য! নাৰী অবিহনে সকলো আধৰুৱা৷ বিভিন্ন সময়ত বিভিন্ন ভূমিকা পালন কৰি আহিছে এগৰাকী নাৰীয়ে৷ কেতিয়াবা যদি জীয়াৰী, পত্নী, কেতিয়াবা ভগ্নী, মাতৃ৷ নাৰী শব্দটো শুনিবলৈ যদিও সৰু ঠিক তেনেকৈ নাৰী শব্দৰ পৰিধি বহল৷ নাৰী ত্যাগ, দয়া, সাহসৰ প্ৰতিমূৰ্তি৷ নাৰীৰ মহাশক্তিয়ে যুগে যুগে আমাৰ সমাজখনক শক্তিশালী কৰি আহিছে৷ এই বিশেষ দিনটোত আন্তৰিকতাৰে কামনা কৰিছোঁ, প্ৰতিগৰাকী নাৰীৰ বাবে সমাজৰ প্ৰতিখন ক্ষেত্ৰ সুৰক্ষিত আৰু মৰ্যাদাসম্পন্ন হওঁক৷
আমাৰ সমাজত নাৰীৰ স্থান বহু উৰ্ধত যদিও কিছু কিছু ক্ষেত্ৰত নাৰীক অৱহেলিতও দেখা যায়৷ সমাজৰ ব্যাধি বাল্য বিবাহ, ডাইনী হত্যা, যৌতুক প্ৰথা, ধৰ্ষণ আদি ভিন্ন ব্যাধিৰ কবলত পৰি বহু নাৰী আজি নিৰ্যাতিতা৷ নাৰী দিৱসৰ দিনা নাৰীৰ ওপৰত ভাষণ প্ৰদান কৰি নাৰীৰ গুণ গৰিমাৰ বিষয়ে কৈ
দায়িত্ব সামৰিলে নহব৷ নাৰীৰ আত্মঅভিমান, মমতাৰ মৰ্যাদা দিবলৈ শিকক, নাৰীক সন্মান কৰক৷