ডিজিটেল ডেস্কঃ ২ ডিচেম্বৰ, অসম দিৱস। শান ৰাজবংশৰ ৰাজকুমাৰ চাওলুঙ চুকাফাক স্মৰণ কৰি পালন কৰা হয় অসম দিৱক। অসম দিৱস উপলক্ষে ৰাজ্যৰ বিভিন্ন প্ৰান্তত আজি বৰ অসমৰ নিৰ্মাতা চাওলুঙ চুকাফাক স্মৰণ কৰা হৈছে। যোৰহাট চুকাফা সমন্নয় ক্ষেত্ৰতো কেন্দ্ৰীয়ভাৱে আয়োজন কৰা হৈছে অসম দিৱসৰ। ৰাজ্যৰ অন্যান্য প্ৰান্তৰ লগতে মহানগৰৰ দিছপুৰ প্ৰেচ ক্লাবৰ বাকৰিতো অসম জাতীয় পৰিষদে আয়োজন কৰিছে অসম দিৱসৰ।

চাওলুঙ চুকাফাৰ কৰ্মৰাজী বৰ অসমৰ ভেটী তৈয়াৰ কৰাত চুকাফাৰ অৱদান নুই কৰি বৰ্তমান অসমৰ কল্পনা কৰাটো অসম্ভৱ। সুদুৰ পাটকাই পৰ্বত পাৰ হৈ সৌমাৰ খণ্ডত চুকাফাই ভৰি থোৱা দিনটোকে ১৯৭২ চনৰ পৰা অসম দিৱস হিচাপে পালন কৰা হয়।
১২২৮ খ্ৰীষ্টাব্দৰ আঘোণ মাহৰ ১৬ তাৰিখে চুকাফাই সৌমাৰপীঠৰ টি-পাম ত বুঢ়ীদিহিঙেৰে উজাই আহি উপস্থিত হয় আৰু সেই স্থানৰ পৰাই তেওঁ নতুন এখন স্বাধীন ৰাষ্ট্ৰৰ সপোন দেখে। আহোম সকলৰ প্ৰথম ৰাজধানী আছিল খামজাং নামৰ ঠাইখনত। তাৰ পিছতেই নামৰূপত, হাবুঙত তাৰ পিছত শেহতীয়াভাৱে চৰাইদেউত ৰাজধানী পাতে। চৰাইদেউতেই স্থায়ী হিচাপে থাকি চুকাফাই বীৰত্ব আৰু বিচক্ষণতাৰে ৩৯ বছৰ ৪ মাহ ১৪ দিন ৰাজত্ব কৰি বিশাল আহোম সাম্ৰাজ্যৰ ভেটি সুদৃহভাৱে স্থাপন কৰে। প্ৰায় ৬০০ বছৰ অসমত আহোমৰ ৰাজত্বৰ এক সোণালী ইতিহাসৰ গুৰি ধৰোতা চুকাফাক সুৱৰি ২ ডিচেম্বৰৰ দিনটোক পালন কৰা হয়।

উল্লেখ্য যে, আজি ৰাজ্যৰ বিভিন্ন প্ৰান্তত জাতীয়তাবাদী যুৱ ছাত্ৰ পৰিষদ, অসম জাতীয় পৰিষদ, অসম প্ৰদেশ কংগ্ৰেছ কমিটি, বীৰ লাচিত সেনাকে আদি কৰি বহুকেইটা দলপ সংগঠনেও ৰাজ্যৰ প্ৰান্তে প্ৰান্তে অসম দিৱসৰ আয়োজন কৰা দেখা গৈছে। লগতে এই দিৱসৰ সৈতে সংগতি ৰাখি উন্নয়নমূলক কামো হাতত লৈছে এই দল সংগঠনসমূহে।