১০.৭২ ছেকেণ্ডৰ ৰাষ্ট্ৰীয় অভিলেখেৰে শনিবাৰে মহিলাৰ ১০০ মিটাৰ ফাইনেলত জয়লাভ কৰি ছেইণ্ট লুচিয়াৰ প্ৰথমটো অলিম্পিক পদক লাভ কৰে জুলিয়েন আলফ্ৰেডে। প্ৰচণ্ড বৰষুণ আৰু ভিজা ট্ৰেকৰ মাজতো আলফ্ৰেডৰ সুন্দৰ আৰম্ভণি আৰু ধাৰাবাহিক গতিয়ে তেওঁৰ জয় নিশ্চিত কৰে।

পূব কেৰিবিয়ান ক্ষুদ্ৰ দ্বীপ ৰাষ্ট্ৰ ছেইণ্ট লুচিয়াৰ জনসংখ্যা মাথোঁ এক লাখ আশী হাজাৰ। চেনী উৎপাদনৰ লগতে পৰ্যটন উদ্যোগৰ দ্বাৰা পৰিচালিত দেশ ছেইণ্ট লুচিয়াৰ বাবে জুলিয়েনৰ এই অলিম্পিক সোণৰ পদকে আন এক অনন্য অভিলেখো কঢ়িয়াই আনিছে। জুলিয়েন আলফ্ৰেডে লাভ কৰা সোণৰ পদকটোৱেই ছেইণ্ট লুচিয়াৰ বাবে অলিম্পিকৰো প্ৰথম পদক! ইয়াৰ পূৰ্বে ছেইণ্ট লুচিয়াত নাছিল কোনো এজন অলিম্পিক পদক বিজেতা!

এই দৌৰত বিশ্ব চেম্পিয়ন আৰু প্ৰিয় ছা’কেৰী ৰিচাৰ্ডছনে ১০.৮৭ ছেকেণ্ডত ৰূপৰ পদক লাভ কৰে আৰু তেওঁৰ সতীৰ্থ আমেৰিকান মেলিছা জেফাৰচনে ১০.৯২ ছেকেণ্ডত ব্ৰঞ্জৰ পদক লাভ কৰে।