ডিজিটেল ডেস্কঃ কৰ’না ভাইৰাছৰ নতুন প্ৰকাৰ অমিক্ৰ’নৰ বৰ্ধিত সংক্ৰমণে পুনৰ আতঙ্কিত কৰি তুলিছে পৃথিৱীবাসীক। পৃথিৱীৰ বহুকেইখন দেশতেই আৰম্ভ হৈছে অমিক্ৰণৰ সংক্ৰমণ। বৰ্তমানলৈ আমাৰ দেশত অমিক্ৰ’নৰ সংক্ৰমণ আৰম্ভ হোৱা নাই যদিও অমিক্ৰ’নৰ বৰ্ধিত সংক্ৰমণ প্ৰতিৰোধ কৰিবলৈ আগতীয়াকৈয়ে কেন্দ্ৰীয় চৰকাৰে নিৰ্দেশনা জাৰী কৰিছে।

মঙলবাৰে মাজনিশাৰ বিমান যাত্ৰীসকলৰ বাবে কাৰ্যকৰী হৈছে কিছু নিয়মাৱলী। এই নিৰ্দেশনা অনুসৰি বিমান যাত্ৰীসকলে বিমানবন্দৰত ৬ ঘণ্টা অপেক্ষা কৰিব লগা হ’ব পাৰে। নতুন নিৰ্দেশনা অনুসৰি প্ৰায় বিদেশৰ পৰা অহা যাত্ৰীসকলৰ বাবে বিমানবন্দৰত আৰটি-পিচিআৰ পৰীক্ষা বাধ্যতামূলক কৰা হৈছে। পৰীক্ষাৰ বাবেই ৬ ঘণ্টা পৰ্যন্ত অপেক্ষা কৰিব লগা হ’ব পাৰে যাত্ৰীসকলে। RTPCR টেষ্টৰ ফলাফল লাভৰ পিছতহে যাত্ৰীসকলক বিমানবন্দৰৰ পৰা বাহিৰ লৈ যাবলৈ অনুমতি দিয়া হ’ব। আনহাতে, বিদেশৰ পৰা বিমানেৰে অহা পাঁচ শতাংশ যাত্ৰীক কোভিড-১৯ পৰীক্ষা কৰাটো বাধ্যতামূলক কৰিছে কেন্দ্রীয় চৰকাৰে।

উল্লেখ্য যে, স্বাস্থ্য মন্ত্ৰালয়ে সংক্ৰমিত দেশসমূহৰ আন্তৰ্জাতিক যাত্ৰীসকলক আৰটি-পিচিআৰ পৰীক্ষাৰ ফলাফল লাভ নকৰালৈকে বিমানবন্দৰত অপেক্ষা কৰিবলৈ পৰামৰ্শ দিছে।