কি কি বিধিৰে সন্তুষ্ট কৰিব দেৱাদিদেৱ মহাদেৱক, শাওনত কি কি কৰিব কি কি নকৰিব জানি লওঁক সবিশেষ

১১ জুলাইৰ পৰা আৰম্ভ হ’ব শাওনৰ মাহ, হিন্দু শাস্ত্ৰ অনুসৰি শাওন মাহটো ভগৱান শিৱৰ প্ৰিয় মাব হিচাপে অভিহিত কৰা হয়৷ উক্ত মাহটো দেৱাদিদেৱ মহাদেৱৰ পূজাৰ বহু অন্তনিৰ্হিত তাৎপৰ্য লুকাই আছে৷
শাওন মাহত ভগৱান শিৱ আৰু মা পাৰ্বতীক উপাসনা কৰিলে জীৱনত সুখ, শান্তি আৰু সমৃদ্ধি লাভ কৰিব পাৰি৷ শিৱলিংগত অভিষেক কৰাস বেলপত্ৰ আগবঢ়োৱা আদি পন্থাসমূহ উপকাৰী হিচাপে বিবেচিত হয়৷

শাওনৰ সোমবাৰে পালন কৰক ব্ৰত-

শাওন মাহৰ প্ৰতিটো সোমবাৰ অতিকৈ গুৰুত্বপূৰ্ণ কাৰণ শাওন মাহ ভগৱান শিৱৰ প্ৰিয় মাহ হোৱাৰ লগতে সোমবাৰৰ দিনটো তেওঁৰ নাম উৎসৰ্গা কৰা হয়৷ কোৱা হয় যে শাওনৰ প্ৰতিটো সোমবাৰে উপবাসে থাকিলে মনোবাঞ্চা পূৰণ হয়৷ অকল এয়াই নহয় অবিবাহিত যুৱক-যুৱতীসকলে এই দিনকেইটাত উপবাসে থাকিলে বা ভগৱান শিৱৰ উপাসনা কৰিলে মনৰ পছন্দৰ পাত্ৰ-পাত্ৰী লাভ কৰে৷

শাওন মাহত কৰক ৰুদ্ৰ অভিষেক

সোমবাৰে গংগাজল, গাখীৰ, ঘিউ, চেনিৰ লগতে অবিৰ, সুগন্ধি, গোটা চাউলৰ শস্য আৰু অন্যান্য পূজাৰ সামগ্ৰী ভগৱান শিৱক আগবঢ়াব লাগে। ইয়াৰ লগতে চেনি, গাখীৰকে ধৰি বগা বস্তুও দান কৰিব লাগে। লগতে ঘৰ বা মন্দিৰত ৰুদ্ৰাভিষেক কৰিলে ঘৰৰ পৰা অপায়-অমংগল নাইকিয়া হয়৷

ভোলেনাথক সন্তুষ্ট কৰিবলৈ ৰাতিপুৱা ব্ৰহ্ম মুহুৰ্তত সাৰ পাই স্নান কৰি তাৰ পিছত মন্দিৰ বা পূজাস্থলী পৰিষ্কাৰ কৰক। এটা পেডেষ্টেলত বগা কাপোৰ মেলি ভগৱান শিৱ আৰু মাতৃ পাৰ্বতীৰ মূৰ্তি স্থাপন কৰি গংগাজল আৰু গাখীৰেৰে অভিষেক কৰি বিলৱপাত্ৰ, চন্দন, চাউল, ফল-ফুল আগবঢ়াওক। কিন্তু একাদশীত ভগৱান শিৱক চাউল আগবঢ়াব নালাগে।